Qırğızıstanda konstitusiyaya düzəlişlərin tətbiqi üzrə referendum və yerli hakimiyyət orqanlarına seçkilər başa çatıb.

Unikal.org  xəbər verir ki, bu barədə ölkənin Mərkəzi Seçki Komissiyası (MSK) məlumat yayıb.

Bildirilib ki, saat 20:00-da 2483 seçki məntəqəsi bağlanıb. Səsvermədə vətəndaşların təxminən 30%-i iştirak edib, ancaq məntəqələrdən Bişkekə informasiyalar gəlməkdə davam edir. Buna görə də rəqəmlər dəyişəcək.

Qeyd edilib ki, səsvermənin gedişini 31 ölkədən 180-dən çox beynəlxalq müşahidəçi izləyib.

***09:50

Bu gün Qırğız Respublikasında Konstitusiyaya dəyişikliklərlə əlaqədar referendum və yerli orqanlara seçkilər keçirilir.

Unikal.org xəbər verir ki, Qırğız Mərkəzi Seçki Komissiyası səsvermənin saat 08.00-dan 20.00-a qədər ölkə üzrə 2 483 seçki məntəqəsində keçiriləcəyini bildirib.

Eyni zamanda 28 xarici ölkədə 48 seçki məntəqəsi açılacaq. Əgər ölkə üzrə 3,6 milyon seçicinin 30 faizindən çoxu səsvermədə iştirak edərsə, referendum baş tutmuş sayılacaq. Yerli orqanlara seçkilərdə baryer müəyyənləşməyib.

Konstitusiyaya təklif edilən dəyişiklik Prezidentin səlahiyyətinin artırılmasını, parlamentin səlahiyyətinin azaldılmasını və deputatların sayının 120-dən 90-na endirilməsini nəzərdə tutur. Konstitusiyaya dəyişiklik qəbul edilərsə, Prezident hökumət üzərində tam nəzarətə sahib olacaq, nazirləri vəzifəyə təyin və vəzifədən azad edəcək. Başqa sözlə, Qırğız Respublikası prezident-parlament üsul idarəsindən prezident üsul idarəsinə keçəcək.