35 saylı Xətai üçüncü seçki dairəsindən millət vəkilliyinə namizəd Rauf Arifoğlu 20 Yanvar faciəsinin ildönümü münasibətilə Xətai rayonunda yaşayan şəhid ailələrini və həmin faciədə sağlamlığını itirmiş vətən övladlarını ziyarət edib. İlk olaraq, 20 Yanvar qazisi Babakişiyev Səlaməddin Xələf oğlunun evinə baş çəkən R. Arifoğlu onunla həmsöhbət olub, problemləri ilə maraqlanıb.

Unikal.org xəbər verir ki, Qanlı 20 Yanvarla bağlı xatirələrindən bəhs edən Səlaməddin Babakişiyev göz yaşlarını saxlaya bilməyib. İtirdiyimiz vətən torpaqlarının həsrəti ilə yaşayan S.Babakişiyevə "Yeni Müsavat" Media Qrupu adından "Vətən sizə minnətdardır" yazılmış plaket hədiyyə olunub. R. Arifoğlu həmçinin qazimizə Qurani-Kərim və bayraq hədiyyə edib.

İkinci baş çəkdiyimiz ailə 20 Yanvar şəhidi Rəhim Rəhimovun həyat yoldaşı Salatın Rəhimova olub. İllərdir dərd-qəmdən, çəkdiyi ailə yükünün ağırlığından vaxtsız qocalan qadın R. Arifoğlunun onu yad etməsindən məmnunluğunu ifadə edib. Həyat yoldaşını gənc yaşda itirən 5 uşaq anası bu illər ərzində yaşadığı problemlərdən danışıb. Rauf Arifoğlunun hədiyyə etdiyi plaket, Qurani-Kərim və bayraq Salatın Rəhimovanı duyğulandırıb. O namizədə seçkilərdə uğurlar arzulayıb, ona dəstəyini ifadə edib.

Növbəti ziyarət 20 Yanvar qazisi Piriyev Samir Fərhad oğlunun evində baş tutub. O qanlı faciədə sağlamlığını itirən vətən oğluna dəstəyini ifadə edən R. Arifoğlu Samir Piriyevi vətənpərvər, cəsur bir insan kimi dəyərləndirib. "Yeni Müsavat" Media Qrupu adından hədiyyə olunan "Vətən sizə minnətdardır" yazılmış plaket qazimizə duyğulandırıb. Ona da Quran və bayraq hədiyyə edilib.

R.Arifoğlu qeyd edib ki, vətən və dövlət bugünkü varlığını və müstəqilliyini məhz onun kimi qazilərə və şəhidlərimizə borcludur. Şəhid ailələri isə hər birimizin diqqət və qayğı göstərməyə borclu olduğu dəyərimizdir. Onun sözlərinə görə, 20 Yanvar həm də Azadlıq və Milli Birlik günüdür. qutlu olsun. R. Arifoğlu bu günü təqvimimizə öz həyatları və qanları ilə yazan  şəhidlərimizə Allah rəhmət diləyib.

 R. Arifoğlunun şəhid ailələrini ziyarəti davam edəcək.

****

Həmçinin Rauf Arifoğlunun seçki kampaniyasında ən çağdaş texnologiyalardan istifadə olunur. Bunlardan biri də Qərb seçki metodlarından olan qapı-qapı metodudur.

Üç nəfərlik qruplarla ərazidəki bütün mənzillərə baş çəkilib. Bu proses üç gündür, davam edir. Bu günə qədər ərazidəki minə yaxın mənzilə R.Arifoğlunun seçki qərargahı tərəfindən təbliğat-təşviqat materialları təqdim olunub.

Orada yaşayan sakinlərlə şəxsi söhbətlər edilib, onlarla xatirə fotoları çəkilib. Bir çoxlarından da hətta ürək sözləri alınıb. Qarşıdakı 10 gün ərzində proses 10 min mənzil hədəfi ilə davam edəcək.