İqtisadiyyat naziri Şahin Mustafayev Çexiyanın Azərbaycandakı səfiri Milan Ekertlə görüşüb.

Nazirlikdən Unikal.org-a verilən məlumata görə, nazir Şahin Mustafayev Azərbaycanın Çexiya ilə əlaqələrə önəm verdiyini, ölkələrimiz arasında əməkdaşlığın inkişafında dövlət başçılarının qarşılıqlı səfərlərinin, bu səfərlər zamanı əldə edilmiş razılaşmaların mühüm əhəmiyyətini qeyd edib. Bildirilib ki, Azərbaycan və Çexiya siyasi, iqtisadi və humanitar sahələrdə sıx əməkdaşlıq edir, qarşılıqlı investisiya qoyuluşları həyata keçirilir. Ölkələrimiz arasında 2015-ci ildə Strateji Tərəfdaşlıq haqqında Birgə Bəyannamə, müxtəlif sahələrdə, o cümlədən ticarət, iqtisadi, ikiqat vergitutma, sərmayələrin təşviqi və qorunması sahələrində 30-a yaxın sənəd imzalanıb. Hər iki ölkənin parlamentlərində qarşılıqlı əməkdaşlıq üzrə dostluq qrupları fəaliyyət göstərir. Azərbaycan Respublikası Hökuməti və Çexiya Respublikası Hökuməti arasında iqtisadi, elmi-texniki və mədəni əməkdaşlıq üzrə Qarışıq Komissiyanın fəaliyyəti ikitərəfli əlaqələrin inkişafında önəmlidir.

Əməkdaşlığın genişləndirilməsi perspektivlərinə gəlincə, İqtisadiyyat naziri qeyd edib ki, sənaye, nəqliyyat-tranzit, kənd təsərrüfatı, ticarət, əczaçılıq, turizm və s. sahələrdə əməkdaşlığın genişləndirilməsi üçün imkanlar var. 

Görüşdə nazir Şahin Mustafayev ölkəmizdə həyata keçirilən islahatlar, yaradılmış əlverişli biznes və investisiya mühiti barədə məlumat verib, çex iş adamlarını Azərbaycandakı sənaye parklarında və məhəllələrində yaradılmış işgüzar şəraitdən yararlanmağa dəvət edib.

Çexiyanın Azərbaycandakı səfiri Milan Ekert  ölkəsinin Azərbaycanla əlaqələrin inkişafına önəm verdiyini qeyd edərək, iqtisadi sahədə Çexiya-Azərbaycan əməkdaşlığının inkişafı istiqamətləri barədə fikirlərini bölüşüb. Keçirilən görüşlərin və aparılan müzakirələrin ikitərəfli əməkdaşlığın inkişafında önəmini qeyd edən səfir ölkələrimiz arasında əlaqələrin inkişafı üçün səy göstərəcəyini bildirib.