İran İslam Respublikasından Azərbaycan Respublikasına piyada yolla gələn Azərbaycan Respublikası vətəndaşları Şahverdiyev İlham Cəlal oğlu və Qafarov Şahin Şaban oğlunun hərəkətləri gömrükçülərdə şübhə doğurduğundan onlar Cənub Ərazi Baş Gömrük İdarəsi Astara gömrük postunun sərnişin idxal xəttində saxlanılaraq əvvəl sorğu-sual edilib, daha sonra isə üzərilərində ayrı-ayrılıqda şəxsi yoxlama aparılıb.

DGK Mətbuat və İctimaiyyətlə Əlaqələr İdarəsindən Unikal.org-a verilən məlumata görə, saxlanılan şəxslərin üzərilərində qanunvericiliklə qadağan olunmuş hər hansı predmet aşkar edilməsə də onların daxili orqanlarının tibbi müayinədən keçirilməsi zərurəti yaranıb.

Astara Rayon Mərkəzi Xəstəxanasında həyata keçirilən rentgenoloji müayinə zamanı saxlanılan şəxslərdən birinin- Şahverdiyev İlham Cəlal oğlunun daxili orqanı - düz bağırsağından şəffaf rəngli sellofona bükülmüş 2 ədəd bağlama aşkar edilib. Baxış zamanı bağlamalarda açıq qəhvəyi rəngli, qablaşdırma ilə birlikdə ümumi çəkisi təqribən 94 qram narkotik vasitə - heroin olduğu müəyyən edilib.

İlkin araşdırma zamanı Şahverdiyev İlham Cəlal oğlu daxili orqanında aşkar edilən narkotik vasitənin onunla birgə İran İslam Respublikasından gələn Lənkəran şəhər sakini Qafarov Şahin Şaban oğluna məxsus olduğunu və həmin maddəni keçirməsi müqabilində Şahin Qafarovun ona 5 qram narkotik vasitə - heroin verməyi vəd etdiyini bildirib.Faktla bağlı araşdırma aparılır.

Qərb Ərazi Baş Gömrük İdarəsinin "Qırmızı Körpü" gömrük postunda Gürcüstandan gələn, Azərbaycan Respublikası vətəndaşının idarə etdiyi "BMW 523" markalı avtomobil Əməliyyat və Təhqiqat İdarəsinə daxil olan məlumat əsasında saxlanılıb və sürücüsü şifahi sorğu-sual olunub.

Dövlət Gömrük Komitəsindən Unikal.org-a verilən məlumata görə, sorğu-sual zamanı vətəndaş idarə etdiyi nəqliyyat vasitəsində gizlədilən və gömrük nəzarətinə mütləq bəyan edilməli hər hansı predmetin olmadığını bildirib. Daha sonra avtomobilə gömrük baxışı keçirilib. Nəticədə minik maşınının oturacaqlarının altından və yük yerindən 2400 ədəd "King" markalı siqaret, 3 ədəd üzərində "Mi 9" yazısı olan telefon qutusu, 3 ədəd USB və qidalandırıcı aşkarlanıb.

Faktla bağlı araşdırma aparılır.​