Ümumilli lider Heydər Əliyevin xatirəsinə həsr olunmuş konkur üzrə CSİ2*W dərəcəsində beynəlxalq turnirə yekun vurulub.
Unikal.org-un Report-a istinadən məlumatına görə, Bakıdakı "Binə" atçılıq mərkəzində keçirilən yarışda ilk pilləni azərbaycanlı çapar Rəşad Səmədov tutub.
İlk yarış günündə yarışların iki mərhələsi keçirilib. Azərbaycan və Lüksemburqdan olan iştirakçılar 15 yorğa atda vaxt nəzərə alınmaqla yarışıb. 36.68 saniyə nəticə ilə birinci yeri "Cissy" ləqəbli atla azərbaycanlı çapar Səid Musayev qazanıb. Azərbaycanla yanaşı, Almaniya, Türkiyə və Lüksemburqdan olan idmançıların da iştirak etdiyi ikinci turda Türkiyə təmsilçisi Ömər Şimşək qalib olub. O, ən yaxşı vaxt göstərisi ilə (62.68 saniyə) 65 xal toplayıb.
Yarışın ikinci günündə də Azərbaycan çaparları fərqləniblər. Konkur növü üzrə turnirdə Azərbaycan, Gürcüstan, Türkiyə və digər ölkələrdən olan idmançılar iştirak ediblər. İdmançılar ilk gündə olduğu kimi, iki mərhələdə mübarizə aparıblar. İlk turda Azərbaycan çaparı Rəşad Səmədov qalib gəlib. Bu dəfə də azərbaycanlı idmançı ən yaxşı nəticə göstərib. Elmar Abdullayev lüksemburqlu Marsel İven və almaniyalı Andre Platı qabaqlayaraq ilk pilləyə sahib çıxıb.
Qeyd edək ki, 2009-cu ildən keçirilən yarışın mükafat fondu 60 000 manatdır.